Eftir afmæli – fyrsta færsla.

Ég er bókstaflega enn í skýjunum eftir velheppnaða afmælisveislu um síðustu helgi. Vissuð þið ekki annars örugglega að ég væri að fara að halda afmæli? Einhvern veginn stórefast ég um að það hafi farið framhjá nokkrum manni…

Já ég er í skýjunum og kem líklegast ekkert niður aftur fyrr en fer að vora.

Ég hreinlega elskaði allt við þetta kvöld og þessa nótt. Og grét krókódílatárum þegar strákarnar tóku tjaldið niður daginn eftir ásamt öllum skreytingunum og ljósaseríum. Tilfinningin var svipuð og ef þeir hefðu slitið úr mér hjartað. Það er svona þegar talsverð vinna er lögð í heildina og allt gengur upp.

Ég tók enga einustu mynd og treysti því á aðra. Ég bíð afskaplega spennt eftir annarra manna myndum. Reyndar er ég búin að fá um 300 frá vini okkar Palla sem byrjaði að taka rétt fyrir miðnætti og fram undir morgun en hef ekki enn birt þær því það tekur tíma að ritskoða svona tökur almennilega. Það myndi henta best að setja þær út kl. 4 að nóttu til. Þegar ég væri vel í því. Þær eru svoldið hressilegar margar hverjar.

Annars óttaðist ég mikið að þetta yrði rólegheitar partý og að enginn myndi grínast neitt í mér, nema kannski mamma með ræðu um hversu mikill ormur ég væri. Sem og hún gerði.

Því pantaði ég bara skemmtiatriði. Hvað annað. Ég pantaði heilan karlakór. Uppáhalds karlakórinn minn. Alltaf þegar þeir troða upp, verð ég eins og rifsberjagel. Ég bað þá um að taka það sem þeir eru bestir í en það eru hin ýmsu krummalög. Uppáhaldið mitt eru Krummavísurnar sjálfar.

En þessir gaurar komu mér heldur betur á óvart! Þeir bættu við prógrammið.

Textinn er eftir Einar Rúnars góðan vin og Keflvíking. Lagið er Krummavísur.

Dagný bloggar neti á

Kaldri vetrarnóttu á

Gerir grín að mér og þér

Og aðallega Fúsa

Fúsa sínum ekki góð

Háð og spott af miklum móð

Hvað er karl að smíííða

Fær ekki að – XXX

Sjúddirarírei, sjúddírarírei

Fær ekki að ríða fagri mey.

Austfirðingur Dagný er

Á sumrin gjarnan þangað fer

Gengur upp að hnjánum

Leitar hún að ánum

Meeeee. Meeee.

Lömbin austra læris laus

Aumingjarnir eru á haus

Pöntuð voru í veislu hennar

Ásamt miklu víni

Skál, Skál

Í skógi hleypur meðal kvenna

samt þær ekki alltaf nenna

Hlaupa drottning hlaupa

Hlaupa drottning hlaupa

Fatapóker

Pussi Riot

Kinky Ladies

Free the Nipples.

Hlaupa Dagný hlaupa.

———————————————————-

Já ég hafði mikið gaman af og þótti óskaplega vænt um þetta. Svona er að búa í Sönderborg!