Pilsið

Ég keypti mér pils í fyrrasumar sem er ekki í frásögur færandi nema fyrir það að það var pantað af netinu í hreinni örvæntingu. Ég var nýkomin heim af sjúkrahúsinu, hitinn var óbærilegur og ég átti af hversdagsfötum einn kjól, tvennar svartar buxur og einar náttbuxur sem höndluðu og huldu bæði margoft uppskorinn og stokkbólgin magann og þvagpokann á lærinu. En buxurnar voru eða eru, ég á þær enn, kolsvartar og brenndu á mér skinnið í sólinni, náttbuxurnar voru síðar og alltof hallærislegar til að taka á móti gestum í og kjólinn svo fleginn að pósturinn var farinn að bera út bréf nágrannanna í okkar póstkassa. Ég fór því á netið, því að ég var ekki búðum hæf og pantaði mér pils svo fallegt að þetta var fallegasta pils sem ég hef á ævinni átt.

Það bjargaði mér, ég elskaði það

það huldi allt sem mig langaði ekki til að sýna

það huldi allt sem aðrir máttu ekki sjá

það leyfði vindinum að umlykja á mér leggina

það var bjart, skemmtilegt, fallegt

það bjargaði mér, ég elskaði það

ég var í því dag eftir dag

alla daga sem sólin skein

og sólin skein alla daga

það var svo þægilegt

og fallegt

ég elskaði það

þangað til í fyrrakvöld.

Það hékk bara inni í lokuðum skápnum

og ég var farin að sofa en ekki sofnuð þegar

pilsið fer að poppa inn í höfðinu á mér

poppaði og poppaði og ég snéri mér og snéri mér

þangað til ég sofnaði

og í gær hélt pilsið áfram að poppa og poppa

allan liðlangan daginn

og maginn í mér skoppaði og skoppaði í ógleði

og ringulreið

tárin runnu

þangað til ég sótti pilsið inni í skáp

og fór með það upp í skáp

á annarri hæð

eins og það myndi laga skoppið í maganum

en það gerði það ekki

ég sótti pilsið upp í skáp og setti það í ösku

niðrí skáp

ofan á hárkolluna

allt var gott

þangað til í dag og maginn fór aftur að skoppa

mig langaði til að gubba

en gerði það ekki

ég sótti öskjuna með pilsinu inní skáp

og setti allt heila draslið í stærri öskju

og læsti henni með gaffateipi

nú er allt gott

punktur