01.29.10
Posted in 2008 at 12:20 pm by Sylvía
Þetta blessaða blogg. Alveg dottið úr tísku. Fáir blogga og fáir lesa. Sorglegt. Það voru svo margir góðir bloggara hérna um árin. Á bloggárunum. Það voru líklega ár í líkingu við síldarárin… nééé það er líklega tvennt ólíkt… á bloggárunum sat hver í sínu horni og festi hugsanir sínar á netið… á síldarárunum unnu menn og konur saman í slepjunni af síldinni allan liðlangan daginn og svo var dansað og farið í sleik á nóttunni. Þar var aldrei neinn í sínu horni.
Síðan síðast, sem var fyrir jól, er ég búin að læra örlítið á fjarstýringuna… kann að fara á 5 helstu stöðvarnar mínar ásamt pornostöðvunum. Fann RUV. Ó jú… og þar sem ég er svo innilega heppin alltaf, er engin sjónvarpsdagskrá á RUV á virkum dögum fyrr en líða fer að kvöldi, sem gerir það að verkum að ég get hlustað á Rás2. Feitt… hef alltaf fundist Rás2 góð rás… svona svipað eins og P3 (nema ég næ ekki p3 almennilega, alltaf smá suð). Og nú veit ég alveg helling um hvað er að gerast á Íslandi… Icesave, söfnun fyrir Haiti, söfnun fyrir handboltastrákana og hálka hér og þar á ýmsum heiðum.
Finnst frábært að hafa RUV. Hef getað horft á alla íslensku leikina 
Á morgun verður mín heitasta ósk að “við” tökum frakkana… er reyndar á kvöldvakt og sé því bara brot úr leiknum… en er að velta því fyrir mér að taka með mér bjór í vinnuna og gefa sjúklingunum ef ísl vinnur. Fengi nú marga plúsa þar
Er eiginlega ekki búin að jafna mig eftir gærkvöldið… er svo sár og svekkt yfir að danirnir hafi tapað. En ef maður spilar ekki betur, á maður ekki skilið að komast áfram… þetta sagði L. Jörgensen og mikið rétt. En samt ergilegt, endalaust ergilegt… alltaf svo gaman að horfa á fallega karlmenn samankomna i hóp… er meira og minna skotin í öllu liðinu. Fúsa finnst það ansalegt… hann er líklega búin að steingleyma þegar hann harðnaði á vissum stöðum þegar Ragnheiður Clausen þula, þuldi upp dagskrá kvöldsins hérna áður fyrr. Hún hefði líklega ekki orðið svona þunglynd ef hún hefði vitað hvernig áhrif hún hafði á karlmenn á landsbyggðinni. Í febrúar 1998 fengum við svimandi símareikning… Fúsi hafði meldað sig veikan í vinnunni einn daginn í janúar og nýtti þennan dag í að hringja í rás2 og kjósa kynþokkafyllstu konu ársins. Hann hringdi 1225 sinnum og kaus Ragnheiði Clausen. Hvert símtal kostaði 99 kr.
Nú er niðurskurður hjá RUV. Hefur aldrei hvarflað að neinum að slaufa þessum blessuðu þulum??? Og Adolf Inga? Ef þulunum væri slaufað, væri kannski hægt að nota brot af þeim sparnaði í að sýna e-ð annað og e-ð örlítið dýrara en Leiðarljós… já og afhverju er leiðarljósmarathon um helgar… bað einhver um það?????? (Þetta var líka í sjónvarpinu áður en við fluttum frá Íslandi fyrir ca. 40 árum!)
Vantaði ekki einhverjum marsvínaunga? Svo sætur kremlitaður hnoðri… skal borga 50kall með honum!
Stelpurnar mínar komu með þá snilldarfrétt í gærkvöldi að Beatrix (marsvinamamman) væri ólétt aftur… ekki gat ég rengt það, þar sem vömbin á henni var frekar sver í báðar áttir. Hvað geri ég nú? Erum ekki einusinni búin að losna við síðasta ungann úr síðasta goti. Annað hvort þarf eg að nauða meira í læknunum a deildinni minni um að gelda Bill eða splæsa í dýralækni.
Nu moksnjóar… alveg kyngir niður og þarsem snjómokstur flokkast undir kvennmannsverk á mínu heimili þarf ég að hundskast út.
Góða helgi kæru landar og góða leiki
Permalink
12.02.09
Posted in 2008 at 12:13 pm by Sylvía
Vissuði að það eru hreint og beint óteljandi stöðvar í sjónvarpinu mínu…? jújú.. fékk þetta um daginn. Það tók 4 -5 daga að læra á fjarstýringuna og kann eiginlega ekki á hana ennþá. Þar sem ég þeystist um göngugötuna í gær og keypti ca 7 jólagjafir, má ég vera heima í dag fram að kvöldvakt. Vaknaði með hausverk (of mikill svefn og lokaður gluggi) og því tilvalið að zappa fyrir alvöru á milli stöðvanna. Ég zappaði og zappaði… og þar sem ég er ekki mikið fyrir ameriska veruleikaþætti, né aðra ameriska þætti almennt og nennti heldur ekki að horfa á Puk leita að týndu fólki úti heimi, slökkti ég bara. Vá, við hverju bjóst ég??? Þá er nú gott að hafa bloggið til tuða á! Ég setti bara Tina Dickow á fóninn og ákvað að segja ykkur frá öllu því ómerkilega sem gerst hefur síðasta sólarhringinn. Og ómerkilegast af því öllu var “zappið”.
Í gær fór ég í fyrsta jólagjafainnkaupaleiðangurinn minn í ár. Fór í ca. 10 búðir á mettíma… og þar sem ég þarf alltaf að gefa einkannir og raða hlutum í sæti, þá ÞARF ég líka að gera það núna!
- Fona –> því ég keypti svo mikið þar og það er til svo endalaust mikið af hlutum sem mig langar í… aðallega cd’um og svo margir á tilboði!!!
- Outlet –> shit hvað ég eyddi miklum pening þar inni… er svo innilega þakklát fyrir að Fúsi spyr svo lítið um hvar ég kaupi hlutina, hvað ég hafi keypt og hvað hlutirnir hafi kostað… keypti nefnilega jólaskraut í Outlet og ég get auðveldlega sagt við Fúsa: “nei nei þetta er allsekkert nýtt… þetta eru einhverjar kúlur sem ég fékk hjá ömmu sem hún hafði átt síðan hún bjó í Stakkahlíð… hefurðu virkilega aldrei tekið eftir þeim áður???
- Jim-P –>keypti nú ekki neitt en langar, eins og venjulega, að kaupa ca 10 stk flíkur þar inni… sá geggjaða dúnúlpu frá Modström með appelsínugulu fóðri… stelpan og ég spjölluðum um úlpuna og ég sagði að það væri smá nostalgía yfir úlpunni með þetta fóður… stelpan horfði á mig með spurningarmerki í sitthvorum augunum og ég fór að rifja upp fyrir henni jakkana sem sem voru svo svakalega í tísku í lok 80 og byrjun 90… þessa svörtu, grænu og dökkbláu… sem hurfu svo af sjónarsviðinu hjá almenningi þegar Hells Angels og aðrir krimmar fóru að ganga massivt í þessu. Stelpan í Jim-P horfði á mig og vissi ekkert hvað ég var að tala um og hvað hún ætti að segja… þá áttaði ég mig á því að hún hefði verið að fæðast um þetta leyti!!!
Ég keypti líka gjöf handa Fúsa… því það var 1.des í gær… þegar ég kom heim úr vinnunni í gærkvöldi fékk ég líka pakka… 2 stk cd með Tina Dickow… vissuði að ég er algjört fan??? Ég ætla að elta hana á næsta ári og skrifa henni bréf og kannski hringja í hana…
Var ég búin að tilkynna öllum hvað mig langar í jólagjöf og hvað mig langar ekki í?
Langar í:
- Stígvél (mjög nauðsynlegt (veit ég fæ þau))
- Allskonar flott föt (sem hægt er að býtta)
- allskonar CD (með býttimiða á)
- pening
- nammi frá íslandi (ekki brjóstsykur)
- smákökur frá íslandi (get nefnilega vegna aðstæðna ekki bakað sjálf)
- BÆKUR (myndi alveg þiggja ca 20 bækur)
- gjafabréf hjá gluggahreinsara sem gildir í 30 ár!
Langar ekki í:
- gjafabréf í Harald Nyborg
- heimilistæki
- gjafabréf í Rúmfatalagernum
- gjafabréf í gæludýra/hestabúð
over and out
Permalink
11.24.09
Posted in 2008 at 3:07 pm by Sylvía
Aldís (á leið útur dyrunum að sækja 3 “nýju” vinkonurnar sínar): “mamma, nennirðu svo að vera búin að skipta um föt áður en ég kem með stelpurnar heim…?”
Ég: “öhh er e-ð að þessum fötum?”
Aldís: “já” og lokar á eftir sér hurðinni.
Stuttu seinna…
Svala: “mamma, ætlarðu ekki að mála þig áður en Aldís kemur heim?”
Ég: “öhh, afhverju?”
Svala: “afþví að þessar stelpur hafa ekki séð þig áður og þekkja þig ekki…”
Ég: “hmm”
Svoldil fýla í gangi…
Ég: “Svala mín, gerirðu þér grein fyrir að þegar þið voruð litlar og það komu gestir, voruð þið stundum brókarlausar… og neituðu að fara í nærbuxur!!!… hvernig heldurðu að mér hafi þá liðið?”
Svala: “ÞÖGN”
Permalink
11.20.09
Posted in 2008 at 11:02 am by Sylvía
Nú tók ég mig saman… hef sagt “farvel” við hangandi six pack’inn og bíð spennt eftir að sá nýji grjótharði banki upp á. 34 ára með lafandi six pack og vera á nálum yfir því að næstum ALLAR buxurnar sargi í sundur þarmana… nei takk, sá kafli er búin! Enda ætti að vera auðvelt að segja nei takk með allt sem í boði er. Ég valdi að skrá mig í mitt gamla fitness og bara í hópa… er víst með vægt ofnæmi fyrir tækjunum og finnst ógeðslegt að sitja í annarra manna rassasvitapolli. Hóparnir eru líka á ákveðnum tímapunkti sem maður er búin að skrá sig í fyrirfram og verður að mæta í, annars verður maður rassskelltur af arabanum honum Jósef ó Jósef!
En nú er komið babb í bátinn eftir mína aðra viku… mér finnst þetta ekkert geðveikt, lyktin er að drepa mig, samhæfingin er NÚLL og tónlistin bara lala. Og svo geri ég ekki annað en að passa að hafa íþróttafötin mín hrein fyrir alla þessa hópatíma. Thanks God fyrir þurrkara!
En þetta virkar… ég hélt ég myndi aldrei losna við hryllilegar harðsperrur eftir fyrstu vikuna… byrjaði í Push sem er alveg fínt því það krefst engrar geðveikrar samhæfingar og ég veit það virkar. Verst er bara að foringinn er stelpa með trilljón sjánlega litla grjótharða vöðva… ég er bara einn stór og mjúkur vöðvi. Ætli ég verði eins og foringinn fyrir jól? Svo fór ég í Salsa og þar er markmiðið að geta tekið þátt í geðveikum hópdans á Agurketid með hræódýran drykk sér við hlið einhverntíman á Góunni. En þar er samhæfingin líka vandamál… “æfi mig þegar ég kem heim” hugsa ég alltaf… en þegar heim er komið man ég ekki ekki neitt. Síðan er það vandræðalegasti tíminn… MBL. Foringinn þar er gullfalleg kornung stelpa sem hoppar eins og fjöður á gormi upp á þessa blessaða bekki, yfir þá, fram og til baka án þess að blása úr nös. Á meðan ég trampa eins og fíll með fílsunga í maganum í zikk zakk á bekkjunum þeas ef ég ligg ekki og kútveltist um þá því ég missi jafnvægið vegna NÚLL samhæfingar. Það eina sem ég get eiginlega gert í stöðunni er að kvarta við Jósef ó Jósep og biðja hann um að finna aðra til að vera foringi í MBL… finnst í algjöru ósamræmi við allt að ég þurfi að fylgja einhverri 19 ára fjöður eftir á þessum pöllum.
Nema ég berjist og berjist og fyrir jól verði ég orðin eins og fjöðrin með trilljón litla harða sjánlega vöðva útum allan kropp.
Góða helgi
Permalink
11.06.09
Posted in 2008 at 11:14 am by Sylvía
Pæjurnar vilja selja boxdýnurúmin sín því það er algjört must að vera bara með svefnsófa sem hægt er að gera tvíbreiðan og bjóða hálfum bekknum að gista hjá sér.
Boxdýnurúmin eru 3, öll 90 cm breið og kosta 200 kr stk.
Permalink
11.05.09
Posted in 2008 at 10:53 am by Sylvía
Ég hef tekið þá ákvörðun um að láta undan samfélagslegum þrýstingi og fara að stunda fitness með hópi fólks. Ákvörðun þessi var tekin þegar ég áttaði mig á að ég passaði ekki inní ávaxtanorm samfélagsins… ég er hvorki epli né pera… ég er óútskýranlegur ávöxtur! En ég vil vera pera! Markmiðið með ákvörðuninni er að verða pera og lifa eðlilegu lífi í gallabuxum 3ja ára og yngri. Mér þætti heldur ekki miður ef ég gæti einnig lifað eðlilegu lífi í næstum prjónuðu lopapeysunni minni en eins og stendur get ég tæplega andað í henni þar sem hún þrengir óþægilega að lungunum í mér. En vanar prónakonur sem ég hitti á förnum vegi í Bilka, segja að peysan gefi sig… sem er eins gott því ekki ætla ég að gefa mig né lungun úr mér.
Veðrið heldur áfram að vera sorglegt. Þó er óveðrið gengið yfir og allt með kyrrum kjörum. Það brast nefnilega á óveður hérna á Mylluhæðinni í fyrrinótt. Ég heyrði hjólin okkar detta og var viss um að síðustu eplin myndi fjúka af trjánum. Eins eru nánast öll skærgulu laufin fallin af Ginkgo Biloba. Litunum fækkar í garðinum og bráðum verður hann bara grá-græn-brúnn með örlitlu bleiku ívafi. Ég verð alltaf svo smeik þegar það er óveður á nóttunni… ég ligg alltaf og ímynda mér að t.d. hjólin fjúki um koll (sem gerðist í fyrrinótt) en ég fæ sáran sting í miðjan magann ef hjólin liggja á hliðinni. Er líka hrædd um að það fjúki e-ð lauslegt í bílinn okkar eða að viðkvæma kúlutréð hreinlega brotni. Allir dauðir hlutir verða lifandi fyrir mér í óveðrum og mig finnur óendanlega til með þeim að þurfa að vera úti. Vildi að ég gæti hýst allt! En eins og ég sagði áður… nú er logn en veðrið bara með eindæmum sorglegt. Ég færi bara að skæla ef ég færi að sísla e-ð í garðinum mínum í dag.
Og nú eru að koma kosningar… og hvað á að kjósa??? Er ekki enn búin að ákveða mig en ætla að senda öllum flokkunum mail og biðja þá um að fresta jólunum í ár… síðan kýs ég þann flokk sem gerir þetta fyrir mig. Veit nefnilega að þetta er bara smáatriði fyrir þá miðað við fjárhagsvandræði sveitarfélagsins, grotnun skólanna, vanrækslu við eldri borgara og að ná markmiðinu um að vera CO2 neutral 2029.
Megi ég eiga góðan dag með góðri bók og hágæða rándýrum prjónum úr búðinni hennar Siggu.
Permalink
10.26.09
Posted in 2008 at 6:01 pm by Sylvía
Vorum að taka til og ef einhver hefur áhuga þá liggja hérna nokkur pör af skóm sem eru á leið eitthvert út.
- Adidas takkaskór nr 36 — lítið notaðir
- Loðfóðruð stígvél nr 36 — dökkgrá og sama og ekkert notuð (mér finnst þau flott)
- pink ballerínuskór frá Bianco nr 36 –svoldið notaðir en heilegir
- svartir lakk ballerínuskór fra Cult nr 36 — ekkert notaðir nema til að safna ryki
Síðan óska ég eftir svörtum leðurstígvélum sem ná upp fyrir hné (eins og stígvélaðikötturinn á) nr 39, tvennum gallabuxum (nr stærra en þær sem ég á núna) og geðveikum ullarjakka í nýjustu tísku í small!
Permalink
Posted in 2008 at 1:13 pm by Sylvía
Ég er bullandi hamingjusöm! Hvaða strumpur sagði að dauðir hlutir gerðu fólk ekki hamingjusamt??? Þetta segir bara fólkið sem langar í allskonar dauða hluti en getur ekki fengið þá… ég verð alltaf ofboðslega glöð þegar ég fæ e-ð steindautt… meira glöð en þegar ég fæ lifandi hluti. Ekki hoppaði ég hæð mína þegar ég þurfti að rúnta um bæinn til að bjarga marsvínunum frá vanrækslu fyrrum eiganda sinna og gerast sjálf hlutaeigandi í þessum sprelllifandi hlutum. En nýuppgert eldhús, með steindauðri borðplötu, blöndunartækjum og nokkrum lítrum að enn meira dauðri málningu… það er málið 
Ég er yfir mig hamingjusöm. En á sama tíma þjáist ég af vægri kvíðaröskun vegna hárblásarans míns sem er orðin 12 ára og 4ja og hálfsmánaðar gamall… það er búist við að hann verði enn meira dauður innan skamms vegna óteljandi aukahljóða… ég á eftir að gráta hann!
En ok, mig langar líka alveg í hund.
Fúsi á allan heiðurinn af að gera mig svona hamingjusama… hann sneið borðplötuna, smíðaði ýmisleg smáatriði, tengdi blöndunartækin og málaði. Ég hefði alveg viljað hjálpa honum að mála (þótt ég hati að mála) en hann ýtti mér í burtu, sagði að ég málaði sjálfa mig og umhverfið meira en skápshurðarnar, málaði ílla og seinkaði verkinu. Hann sagði að ég ætti bara að sinna húsmóðursstörfunum… sem eru að:
- prjóna á sjálfa mig
- blása á mér hárið
- kaupa allskonar dauða hluti
- grilla í svarta myrkri og skíta kulda
- hanga á facebook
- ráðast á garðinn og gera hann sem lægstan (hafiði séð hvað ég gerði???)
Fyrir ca 2 vikum fór ég í apotekið til að kaupa dagkrem. Ég vissi svosem alveg hvað ég ætlaði að kaupa en bað samt um þjónustu því ég elska þjónustu. Daman horfði rannsakandi á mig og inn í húðina á mér og sagði svo:
- “já, þú þarft svona upplyftingarkrem…”
- Ég: “öhhh”
- Apotekaradaman: “hvað ertu annars gömul?”
- Ég: “öhh 34″
- Apotekarakonan: “já einmitt, upplyftingarkrem… hmm hmm hvar er nú besta kremið… hmm hmm.. það er ekki til… kemur eftir helgi… en hérna, taktu prufur og prófaðu það… (fæ sko alltaf prufur í apotekinu)
Ég fór heim með 30 ml af ýmislegum prufum og réðist strax á upplyftingarkremið… jeminn eini… á einum og hálfum sólarhring virkaði það svo yndislega vel að fólk hélt ekki lengur að ég væri 24 heldur 18!!! Pælið í því… 18 ára!!! Að sjálfssögðu fór ég strax eftir helgi og keypti heila krukku af þessu undraefni… og nú er svo komið að á morgnana vakna ég og lýt út eins og ég standi á haus!
Permalink
09.10.09
Posted in 2008 at 10:23 am by Sylvía
Þessi færsla er algörlega óháð fyrri færslum og má alls ekki með nokkrun hætti bendla hana við þær.
Svo er mál með vexti að síðustu tvær kvöldvaktir hafa fengið okkur hjúkkurnar til að spá svolítið íhversu mikið maður hugsar bara um sitt eigið tippi (myndi allavega gera það ef ég væri með tippi).
Fyrir örfáum dögum fannst múslímskur maður að sunnan mikið veikur á parkeringsplássi hér í nágrenninum. Hann er langkeyrsluvörubílstjóri og talar ekki dönsku, ensku né þýsku. Jú, ok, örfá orð í þýsku… líklega mest orð eins og “anlassen” og “auflassen” en alls engin persónuleg orð. Þar sem maðurinn er að sunnan, þekkir hann alls engan hér í DK.
Hann var lagður inn hjá okkur. Við pöntuðum túlk með það sama. Túlkurinn túlkaði planið fyrir músliman að sunnan og fór svo. Aumingja maðurinn var einn… allslaus, því allt dótið hans var í bílnum og mállaus.
En skyndilega fór fólk að koma, fólk frá sama landi og hann. Við settum í brýrnar og spáðum talsvert í hvaðan þetta fólk kæmi. Maðurinn var jú einn og þekkti engan og landið hans mjög langt í burtu. Þetta heimsóknarfólk talaði líka dönsku. Við bölvuðum túlkinum svolítið fyrir að brjóta þagnarskylduna, en ákváðum síðan að spyrja fólkið hvað væri í gangi. Jú, þannig var mál með vexti að túlkurinn hafði sett sig í samband við félagið þeirra (eins og ísl.fél okkar) og beðið fólk um að heimsækja manninn og spjalla við hann. Eins og við manninn mælt streyma menn inn, fólkið er líka búið að fara í bílinn hans og sækja dótið hans og setja sig í samband við fyrirtækið hans og redda ýmsum málum. Það koma bara menn í heimsókn, en þetta eru menn á öllum aldri og þeir koma færandi hendi með ýmislegt matarkyns. Sjúklingurinn hefur það bara gott miðað við aðstæður, bíður og vonast eftir að verða fluttur til síns heimalands en eins og er, er það ekki hægt vegna ástands hans.
Í gærkvöldi kom einn af mönnunum inn á skrifstofu til okkar, hann var varla komin með bílpróf en nennti samt að eyða kvöldinu í miðaldra karl sem hann þekkti ekki neitt. Þessi ungi sagði: “VINI OKKAR finnur til, getiði hjálpað honum?”
Við litum hver á aðra og held við allar höfum hugsað það sama… þessir menn hugsa ekki bara um sitt eigið tippi.
Myndi ég nenna að eyða seinnipörtunum og kvöldunum í að heimsækja mállausan íslending upp á sjúkrahús?
Mig því miður grunar að ég hugsi alltof mikið um mitt eigið tippi!
Permalink
08.30.09
Posted in 2008 at 2:09 pm by Sylvía
…Framhald af síðastu færslu
Leiðin lá austar. Í snælduvitlausu roki sem feykti flestum fossum uppá við, ókum við í honum Klobba, í góðu skapi eftir velheppnaða útilegu. Nestið innihélt Egilsappelsín, ásamt fleiru vel sætu úr kaupfélaginu á Selfossi og á ekkert var hlustað þar sem við gleymdum ipod bíladæminu í DK og það virðist nú e-ð vera lítið um útvarp á þessum slóðum. Ég stakk upp á mismunandi bílaleikjum eins og við leikum alltaf á hraðbrautinni, en þar gáfumst við nú fljótlega upp því við mættum engum bíl. Allir komnir heim til sín eftir verslunarmannahelgina og engin hefur séð neina ástæðu til þess að skreppa á rúntinn um suðurlandið, reyndar alla leið á milli Selfoss og Egilsstaða. E-ð misreiknuðum við vegalengdir á milli bensínstöðva og salerna, því bæði þurftum við að pissa útí móa og krossa fingur í von um að ná á næstu bensínstöð. Það var N1. Stöðin var heldur í minna lagi og lítið um mannaferðir. Þannig að við bönkuðum upp á hjá bóndanum sem kom svo á fjórhjólinu sínu þessa 30m að besnínskúrnum… algjör gæi þessi bóndi Stelpunum fannst þetta mjög sérstakt.
Í nágrenni Hornafjarðar stoppuðum við hjá Snæbjörgu vinkonu minni og fengum þar mjólk nánast beint úr beljunni, stelpurnar áttu ekki til orð og sögðu því lítið. Ég hef víst ekki verið dugleg í að fræða þær um lífið í sveitinni og hvað þá á kúabúum þar sem ég hef aldrei verið nein fjósakona. En mikið óskaplega held ég að þær hefðu gott af að fara í sveit til Snæbjargar minnar… það myndi líklega gera þær að alvöru mönnum… jújú það held ég nú.
Frá Snæbjörgu lá leiðin á Djúpavog og þar var blaðran tæmd á venjulegu salerni í sjoppunni á Djúpavogi og keyptur ís. Síðan var það Öxi. Það var svartaþoka og allsengin umferð. Ég keyrði Klobba og var hálffegin þokunni þar sem það er örlítill snertur af lofthræðslu innst inní heilahvolinu á mér (hef líkl aldrei sagt ykkur frá því og ætla mér ekki að gera það, svo að gleymið þessu bara), sem myndi þó aldrei hindra mig í neinu sem ég ÞARF að gera eða fara. En við vorum ekki komin langt þegar hitamælirinn í Klobba fór að hækka og fór hækkandi með hverjum metranum. Allt bullsauð. Ok, þar varð að stoppa. Og bíða. Og fylla á úr læknum… í miðri svartri þokunni á Öxi. Og áfram komumst við og alla leið í Eiða.
Á Eiðum var bara chillað (slappað af og verið cool), þangað til veðurspáin varaði við íllviðri hinndaginn. Við drifum okkur í Stóru Urð á meðan veðrið var gott. Ókum í gegnum Hjaltastaðaþinghánna og fram hjá bensínstöðinni gömlu og nýja sjoppusjálfsalanum. Í Stóru Urð mættum við fleira fólki en samtals alla leiðina frá Selfossi og upp í Vatnskarð. ALLIR voru í Stóru Urð þann daginn. Við löbbuðum vitlausan hring, viltumst í Stóru Urð en komumst þrátt fyrir allt, heil á húfi í bílana
(sjá myndir á fb eftir smá stund)
Permalink
« Previous entries